Sufaid Par Aur Siah Ankhain
Us kay sufaid paron talay rait thi. Aur meri siah aankhon main aansoo thay. Woh us jheel pe marnay k liay aa gai thi. Aur main wahan khara khara hi mar gaya tha. Maan lijiay kabhi kabhi mardon kay bhi aansoo aa jatay hain…
Jab kisi ki shashm-e-hera’n main sitaray chamaktay thay tab humara khayal tha k humain mohabbat ha. Aur humain lagta tha k humari mohabbat sub say alag ha. Aur humain bohat mohabbat thi, humain yehi lagta tha. Aur muneer niazi us waqt jhoot boltay thay k mohabbat ab nahi ho gi, yeh kuch din baad main ho gi, guzar jayin gay jab yeh din, yeh in ki yaad main ho gi. Jhoot boltay thay…
Aur pata bhi nahi chala kab parhai khatm hui. Mujhay final exams say pehlay hi job mil gai. Promotion hoti gai. Phir mujhay head office Lahore bula lia gaya. Us nay bhi job shuru kar di. Phir ghar basanay ka khayal aaya. Kuch bhi to pata nahi chala…
Pata to us din chala jab us ki shashm-e-hera’n aur hera’n ho gai. Humain nahi pata tha mohabat zaat nahi hoti. Zaat hi zaat hoti ha. Aur us k abbu ko samajh nahi aa raha tha k woh jutt logon say bahar kaisay rishta tay kar dain. Yeh kabhi hua nahi tha. Aur isi liay nahi ho sakta tha. Aur…. Hua bhi nahi… Aur woh din guzar gaye… Shashm-e-hera’n main sitaray na rahay. Jamal-e-abr-o-bara’n dobara nahi deekha. Aur ab lagta ha muneer niazi jhoot nahi kehtay thay…
Aur us kay sufaid paron talay rait thi… Aur meri siah aankhon main aansoo thay…
